من أصعب القرارات اللي ممكن الإنسان ياخدها هو قرار إنه ينهي علاقة كان بيتمنى تكمل.
وغالبًا السؤال الحقيقي مش بيكون:
"أمشي ولا لأ؟"
لكن بيكون:
هو أنا فعلًا عملت كل اللي أقدر عليه؟ ولا مستعجلة؟
لو بتسألي نفسك السؤال ده، فدي مجموعة علامات تساعدك تشوفي الصورة بشكل أوضح.
1 . لما تكوني حاولتي أكتر من مرة ومفيش تغيير حقيقي
كل العلاقات بتمر بخلافات، لكن الفرق بين العلاقة الصحية والعلاقة المؤذية إن الطرفين بيحاولوا يصلحوا.
لو اتكلمتي، وشرحتي، ووضحتى احتياجاتك، واديتِ فرص كتير لكن نفس الأذى بيتكرر بدون أي رغبة حقيقية في التغيير، فده معناه إن المشكلة مش في إنك موصلتيش لكن في إن الطرف الآخر مش مستعد يسمع.
2. لما تبقي بقيتي بتخسري نفسك علشان تحافظي على العلاقة
تلاقي نفسك بتسكتِ عن حاجات بتوجعك.
بتتنازلي عن احتياجاتك.
بتغيري شخصيتك.
وبقيتي خايفة تعبري عن رأيك.
العلاقة الصحية المفروض تخليكي أقرب لنفسك، مش أبعد عنها.
3. لما تكوني حاسه انك مستنزفة ومش مرتاحة
اسألي نفسك:
آخر مرة حسيتِ فيها براحة وأنا مع الشخص ده كانت إمتى؟
لو أغلب مشاعرك بقت قلق، توتر، خوف، انتظار، أو استنزاف.. فده مؤشر مهم إن العلاقة بقت بتستهلكك أكتر ما بتغذيكي.
4. لما تبقي قاعدة علشان الأمل .. مش علشان الواقع
كتير من الناس بيعيشوا على جملة:
"أكيد هيتغير."
لكن السؤال الأهم:
لو الشخص فضل زي ما هو خمس سنين كمان هتقدري تكملي؟
خدي قرارك بناءً على الواقع، مش على النسخة اللي بتتمنيها.
5. لما تكوني بقيتي بتبرري الأذى باستمرار
"هو مضغوط."
"أصله اتربى كده."
"هو بيحبني بس مش بيعرف يعبر."
تفهم ظروف الشخص شيء جميل
لكن تبرير الإساءة المستمرة شيء مختلف تمامًا.
التفهم لا يلغي حقك في الاحترام.
6. لما الخوف من الوحدة بقى أكبر سبب لاستمرارك
أوقات كتير بنفضل في علاقة مش لأنها مناسبة
لكن لأننا خايفين نبدأ من جديد.
وخلي بالك
الخوف من الوحدة ممكن يخلينا نقبل حاجات عمرنا ما كنا هنقبلها لو كنا مطمئنين لقيمتنا.
7. لما قرار الرحيل بقى نابع من احترامك لنفسك مش من الغضب
أحيانًا الناس بتمشي وهي منفعلة، وبعدها ترجع.
لكن القرار الناضج بيكون بعد تفكير هادئ.
لما توصلي لمرحلة تقولي فيها:
أنا بحب الشخص ، لكن العلاقة دي مبقتش صح ليا.
أو
أنا زعلت كتير، حاولت كتير، واتعلمت كتير والنهارده باختار أحمي نفسي.
ساعتها بيكون قرار الرحيل أقرب للنضج منه للهروب.
في النهاية..
اسألي نفسك:
- هل أنا مرتاحة ولا متعودة؟
- هل أنا محبوبة كما أنا، ولا طول الوقت بحاول أثبت استحقاقي؟
- هل وجودي في العلاقة بيخليني أكبر، ولا بيخليني أنطفئ؟
الإجابة الصادقة على الأسئلة دي، في أغلب الأحيان، هتوصلك للقرار المناسب.
لأن الشخص اللي بيحبك بصدق، مش هيخليك طول الوقت محتارة بين كرامتك وبين استمرار العلاقة.
