في لحظة واحدة كل حاجة بتتغير. شخص كنتِ بتكلمي معاه كل يوم، بقى ذكرى! خطة كانت مرسومة، اختفت! وإحساس الأمان .. اتكسر.
بس الحقيقة اللي ناس كتير مش بتقولها: الـ Move On مش قرار .. ده رحلة نفسية كاملة.
ليه الفراق بيوجع
علم النفس بيقول إن الانفصال العاطفي مش مجرد حزن ! ده نوع من الحِداد (Grief).
الدراسات بتوضح إن اللي بنحسه بعد الانفصال بيشبه نفس مراحل الحزن بعد فقدان شخص عزيز
يعني ببساطة: أنتِ مش ضعيفة ..أنتِ بتمرّي بعملية نفسية طبيعية جدًا
مراحل الموف اوف ( مش شرط بنفس بالترتيب )
1. الصدمة والإنكار " لا!! ده أكيد هنرجع تاني "
2. الغضب " ليه عمل فيا كده؟! "
3. المساومة " طب لو كنت عملت كدا .. كان ممكن نكمل؟ " ودي اخطر مرحلة
4. الحزن فقدان، فراغ، فقدان شغف بالحياة، او يمكن يوصل لاكتئاب
5. التقبّل مش نسيان .. لكن سلام داخلي الحمدلله هو "لا يصلح"
الدراسات أثبتت أن:
- الانفصال العاطفي يعتبر من أصعب التجارب النفسية اللي ممكن يمر بيها الإنسان.
- المشاعر زي الحزن والغضب بتكون أعلى بكتير بعد الانفصال مقارنة بالعلاقات المستقرة.
- العقل بيتعامل مع الفراق كـ “خسارة حقيقية” مش مجرد تغيير.
الحقيقة اللي محدش بيقولها : أنتي مش بتتخطي الشخص!! أنتي بتتخطي نفسك (النسخة اللي كنتي عليها معاه)
دورك .. أحلامك .. إحساسك بنفسك ، علشان كده الوجع عميق جداً.
يعني ايه موف اون ؟
الـ Move On مش:
❌ نسيان الشخص ❌ إنك تبطلي تفكريه وتبطل تحلم به ❌ إنك تدخلي علاقة بسرعة
لكن هو:
✔ تقبّل إن العلاقة انتهت ✔ استعادة نفسك من غيره ✔ بناء حياة مش متعلقة بوجوده
ازاي المخ بيتعافى ؟
لما تتقبل مشاعرك أين كانت :
- تتقبل إنك كنت ساذجة في بعض المواقف !
- تتقبل إن الشخص دة أذاكِ
- تتقبل إنه (لا يصلح ) } لو كان خيراً لبقى .. لو كان هو خير كان ربنا قدر انه يبقى معاك
- تتقبل مشاعرك إنك : حزينة وموجوعة وقلبك مكسور بالمعنى الحرفي
- تتقبل إن رغم كل الزكريات دي كلها ولكن هو مش نصيبك للنهاية
والدراسات بتأكد: أن تقبل المشاعر = تعافي أسرع .
خطوات عملية للـ move on ❤️
1. اكتب له رسالة أو جواب
- لو عندك فرصة تقولي كل الكلام اللي جواك اكتبيه وابعتيه
- لو خلاص سيبته بعد او حصل انفصال بعد الطلاق اكتب جواب غير مرسل
ودة بيفرق حسب كل قصة بينفع نبعت الجواب ولا لا .. ومش مهم يتبعت اوي المهم نفرغ الوجع على الورق ودي اهم خطوة .. كل وجع كل كلمة كل حرقة قلب محتاجة تطلع من قلبك وتتكتب على الورق وبمجرد ماتكتب خلاص متقوليهاش تاني ولا تفكري في دة تاني عشان عقلك ميرجعش يستحضر المشاعر.
2. اقطعي الاتصال (No Contact)
عارفة رضوى الشربيني وهي بتقول block block .. دي اجمل نصيحة بجد
ودة بنية العقاب .. ده حماية لقلبك ونفسيتك لأن المراقبة من اكتر الوسايل المؤلمة والموجوعة واغلب الرجال بيهربوا من مشاعرهم فبيظهروا ع السوشيال ميديا حاجات بعيدة عن الحقيقة أو ممكن يستبدلك بواحدة تانية ودة موجع اكتر أو يكون توكسيك اكتر وينزل لك بوستات فيها رسايل لك .. في كل الاحوال المراقبة مؤلمة.
فاكره لما قولتلك مرحلة المساومة اخطر مرحلة ؟! لان لو حصل اتصال في المرحلة دي انتِ هترجعي تاني تلفي في دائرة علاقة مؤذية بتكسر القلب مراراً وتكراراً.
3. ارجعي لنفسك ( من أهم الخطوات لان العلاقة المؤذية غالبا بتعطلك عن التطور)
- الصلاة والعبادة لدرجة ان قلبك يطمن.
- الجيم والرياضة لدرجة ان عقلك يهدى.
- الشغل وتطوير الذات لدرجة الشعور بالانجاز.
- الصحاب واللمة الحلوة لدرجة الشعور بالونس.
- الذِكر ( من خلال سبحة رقمية ودة من افضل الوسائل بجد لو عندك غضب حققِ مثلاً 1000 حسبي الله ونعم الوكيل في اليوم ، لو عندك جلد ذات حقق 2000 استغفار ، لو محتاجة سلام حقق 3000 صلاة على النبي ) العدد ممكن يبقى اقل أو اكثر حسب قدرة كل شخص مش بقول عدد محدد خالص ولكن حاول تجيب اقصى عدد بالنسبة لك ، لو قدرتك العادية بتجيب في اليوم 5000 يبقى تجيب 6000 ، شبه فكرة الفشل العضلي في الجيم وهكذا ..
4. افهمي الدرس مش الغلط ( ودة اللي هيوصلك للتقبل بسرعة)
مش “أنا وحشة” لكن: “أنا اتعلمت”
خلي بالك كويس اوي بتكلمي نفسك ازاي ؟
الجانب اللي محدش بيركز عليه: النمو
رغم الألم .. الدراسات بتقول إن الانفصال ممكن يكون بداية نضج نفسي وتطور شخصي.
يعني أحيانًا أكبر وجع = أكبر نقلة في حياتك
✨ الخلاصة
الـ Move On مش سباق ومش له وقت محدد
لكن كل يوم:
- بتفهمي نفسك أكتر
- بتتعلقي أقل
- بتقربي لنسخة أقوى منك
وفي يوم هتصحي وتقولي بكل رضا وسلام بعقلك وبقلبك :
"الحمدلله اننا مكملناش مع بعض! "
المراجع
- Cleveland Clinic. (2023). Stages of grief after a breakup.
- Sbarra, D. A., & Emery, R. E. (2005). The emotional consequences of divorce: Empirical findings and theoretical issues. Psychology, Public Policy, and Law, 11(2), 288–312.
- Travers, M. (2024). A psychologist explains the 5 stages of post-breakup grief. Forbes.
